काठमाडौँ – व्यवसायी पूर्ण श्रेष्ठ र टिना श्रेष्ठले आफ्ना २ वर्षे छोराको जन्मदिनको अवसरमा विभिन्न वृद्धाश्रम र बालाश्रमलाई खाद्यान्न तथा न्यानो टोपी, कपडा वितरण गरेका छन् ।
माघ ५ गते छोरा प्रियान्स २ वर्ष पुगेको अवसरमा विभिन्न चार आश्रममा पुगेर उनीहरूले खसीको मासु, विस्कुटसहित न्यानो कपडा गरी डेढ लाख रुपैयाँ बराबरको सहयोग वितरण गरेका हुन् । सहयोग लिएर उनीहरू ४१ ज्येष्ठ नागरिक रहेको तीनकुनेको निसहाय सेवा सदन, ५५ ज्येष्ठ नागरिक रहेको गोल्फुटारको रिमा सेवा समाज, गोंगबुको हिमालय वृद्धाश्रम केन्द्र र ११ बालबालिका रहेको गोकर्णको सुनौलो पाइला बाल आश्रममा पुगेका थिए ।
‘छोराको जन्मदिन वृद्धाश्रममा सहयोग गरी मनाएर हामीले उसलाई निसहायको सेवा गर्नुपर्छ भन्ने सिकाउन पनि खोजेका हौँ, ज्येष्ठ नागरिकप्रति आफूले गर्न सक्ने कर्तव्य पनि निभाएका हौँ’, पूर्णले भने, ‘हामीले दिएको सहयोग पाएपछि ती बाआमा, केटाकेटीको अनुहारमा देखिएको खुसीले छुट्टै आनन्द दिने रहेछ ।’उनले आगामी दिनमा पनि निरन्तर सहयोग गर्दै जाने बताए ।
सहयोग बुझ्दै हिमालय वृद्धाश्रम केन्द्रक अध्यक्ष सरला पन्थीले जन्मदिनमा फजुल खर्च गर्नबाट जोगिएर आश्रमका बुबाआमालाई सहयोग गर्न आएकोमा धन्यवाद ज्ञापन गरिन् । तीनकुने, गोल्फुटार र गोकर्णको बाल आश्रमका सञ्चालकले पनि उदाहरणीय काम गरेकोमा श्रेष्ठ दम्पत्तिको तारिफ गरे । पूर्णले गोकर्णको बाल आश्रमका लागि साप्ताहिक रूपमा आवश्यक मासु सहयोग गर्ने घोषणा पनि गरे ।
पूर्ण ललितपुरको ग्वार्कोमा उदयपुरे मासु पसल चलाउँछन् । उनको पसल खासगरी मटन सुकुटीका लागि चर्चित छ । पूर्ण र टीनाका दुई छोरा छन् । २ वर्षे प्रियान्सका तीन महिने भाइ छन् ।
