काठमाडौं – सरकारले टुँडिखेलमा विशेष समारोह गरी ७५ औं राष्ट्रिय प्रजातन्त्र दिवस भव्य रूपमा मनाएको छ। समारोहमा राष्ट्रपति रामचन्द्र पौडेल, प्रधानमन्त्री केपी शर्मा ओली लगायत सरकारका उच्च पदस्थ व्यक्तित्वहरूको उपस्थितीमा प्रजातन्त्र दिवस मनाइएको हो ।
समारोहमा स्वतन्त्रताको प्रतीक परेवा उडाइएका थिए भने नेपाली सेना र नेपाल प्रहरीको टोलीले विभिन्न कला कौशल प्रस्तुत गरेका थिए। साथै, विभिन्न सांस्कृतिक समूहहरूले झाँकी प्रदर्शन गरी नेपालका विविधता झल्काएका थिए।
प्रजातन्त्र दिवसका अवसरमा मूल समारोह समितिद्वारा सैनिक मञ्च टुँडिखेलमा विशेष कार्यक्रम आयोजना गरिएको थियो, जसमा राष्ट्रपति पौडेल प्रमुख अतिथिका रूपमा सहभागी भए।
यस अवसरमा सरकारले देशभर सार्वजनिक बिदा दिएको छ। नेपालमा २००७ साल फागुन ७ गते जहानियाँ राणा शासनको अन्त्य भई प्रजातन्त्रको स्थापना भएको ऐतिहासिक दिनको सम्झनामा हरेक वर्ष यो दिवस मनाइन्छ।
