काठमाडौँ – महाशिवरात्रि नजिकिँदै जाँदा पशुपतिनाथ मन्दिर परिसरमा भव्य तयारी भइरहेको छ। चित्रकारहरू मन्दिरका भित्ताहरूमा देवी-देवताका सुन्दर चित्रहरू कोर्ने काममा व्यस्त छन्। पशुपति क्षेत्रभित्रका विभिन्न पर्खाल र खाली ठाउँहरूलाई धार्मिक कला र संस्कृतिसँग जोड्ने प्रयासस्वरूप यी चित्रहरू बनाइएका हुन्।
चित्रकारहरूका अनुसार यी चित्रहरूले पशुपति क्षेत्रमा आउने भक्तजनलाई धार्मिक वातावरण प्रदान गर्नुका साथै कला संरक्षणको पनि सन्देश दिन्छ। महाशिवरात्रिका लागि हजारौँ भक्तजनको घुइँचो लाग्ने पशुपतिनाथ मन्दिर क्षेत्र अहिले नै चहलपहलपूर्ण देखिन्छ।
यस क्रममा मन्दिर दर्शन गर्न आउने श्रद्धालुहरू चित्रहरू अवलोकन गर्दै तस्बिर खिच्ने र सेल्फी लिने क्रम बढेको देख्न सकिन्छ। धेरै भक्तजनहरूले सामाजिक सञ्जालमा यी चित्रहरू साझा गर्दै धार्मिक र सांस्कृतिक महत्वको प्रचार गरिरहेका छन्।
पशुपति क्षेत्र विकास कोषले शिवरात्रि नजिकिँदै गर्दा सरसफाइ, व्यवस्थापन र सजावटमा विशेष ध्यान दिइएको जनाएको छ। महाशिवरात्रिका लागि भारत तथा अन्य देशबाट समेत साधु-सन्तहरूको आगमन भइसकेको छ। भक्तजनहरूलाई सहज दर्शनका लागि सुरक्षा तथा व्यवस्थापनका विभिन्न उपायहरू अपनाइएका छन्।
शिवरात्रिको दिन पशुपतिनाथ मन्दिरमा लाखौँ श्रद्धालुको भीड लाग्ने अनुमान गरिएको छ। धार्मिक महत्त्वका कारण यो दिन पशुपति क्षेत्र मात्र होइन, देशभरका शिव मन्दिरहरूमा विशेष पूजाअर्चना गरिन्छ।
