काठमाडौँ – शुक्रबार भएको राजावादी आन्दोलनका क्रममा पत्रकार सुरेश रजकको हत्या गरिएको घटनाको विरोधमा नेपाल पत्रकार महासंघले शनिबार बिहान माइतीघर मण्डलामा विरोध प्रदर्शन गरेको छ।
परिस्थितिमा आएको परिवर्तनका कारण महासंघले आफ्नो स्थापना दिवसका पूर्वनिर्धारित सम्पूर्ण कार्यक्रम स्थगित गरी शोक र विरोध प्रदर्शनमा उत्रिएको हो। शुक्रबार आन्दोलनको भिडियो खिचिरहेका बेला तीनकुनेस्थित एक घरमा आन्दोलनकारीहरूले आगजनी गरेपछि सञ्चारकर्मी सुरेश रजकको निधन भएको थियो।
यसअघि महासंघले स्थापना दिवसलाई पत्रकार हत्या, सञ्चार गृह तथा सञ्चारकर्मीमाथिको हमलाविरुद्ध आन्दोलनका रूपमा शोकसभा तथा विरोधसभाको रूपमा मनाउने निर्णय गरेको थियो।
नेपाल पत्रकार महासंघले स्वतन्त्र प्रेसमाथिको आक्रमणको घोर निन्दा गर्दै दोषीलाई तत्काल कानूनी कारबाहीको माग गरेको छ। महासंघले पत्रकारहरूको सुरक्षाका लागि प्रभावकारी कदम चाल्न सरकारसमक्ष आग्रह समेत गरेको छ।
