काठमाडौं – प्रधानमन्त्री केपी शर्मा ओली बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) शिखर सम्मेलनमा सहभागी हुन आज थाइल्याण्ड प्रस्थान गरेका छन्। त्रिभुवन अन्तर्राष्ट्रिय विमानस्थलमा उनलाई बिदाइ गरिएको छ।
प्रधानमन्त्री ओलीले अप्रिल २ मा थाइल्याण्डका प्रधानमन्त्री पाइतोनगतार्न सिनावात्रासँग द्विपक्षीय भेटवार्ता गर्नुका साथै विभिन्न विषयमा समझदारी गर्ने कार्यक्रम छ। उनले अप्रिल ४ मा बिमस्टेकलाई सम्बोधन गर्नेछन्।
बिमस्टेक शिखर सम्मेलनको क्रममा अप्रिल २ मा सदस्य राष्ट्रका उच्च अधिकारीहरूको बैठक बस्नेछ भने अप्रिल ३ मा विदेशमन्त्रीस्तरीय बैठक हुनेछ। यसपटकको शिखर सम्मेलनमा थाइल्याण्डले ‘बिमस्टेक बैंकक भिजन २०३०’ प्रस्तुत गरेको छ, जसको उद्देश्य २०३० सम्म समृद्ध, लचिलो र खुला बिमस्टेक (प्रो-बिमस्टेक) निर्माण गर्नु हो।
थाइल्याण्ड सरकारका अनुसार यो भिजनले शान्ति, स्थिरता, आर्थिक वृद्धि, र दिगोपनलाई प्रवर्द्धन गर्दै बंगालको खाडी क्षेत्रीय सहकार्यको लागि स्पष्ट दिशा र प्राथमिकता तय गर्नेछ। छैटौं बिमस्टेक शिखर सम्मेलनले व्यापार, लगानी, र दिगो विकासलाई प्रवर्द्धन गर्दै गरिबी निवारणलाई तीव्र पार्ने लक्ष्य राखेको छ। साथै, कृषि, पशुपालन, मत्स्यपालन, स्वास्थ्य संकटको तयारी, र दिगो पर्यटन प्रवर्द्धनलाई प्राथमिकता दिइएको छ।
समिटले साझा सुरक्षा र विकास चुनौतीहरूलाई सम्बोधन गर्न सदस्य राष्ट्रहरूबीच सहकार्यलाई प्रवर्द्धन गर्ने लक्ष्य राखेको छ। बिमस्टेकको महत्त्वपूर्ण भूमिकालाई सशक्त बनाउन यस सम्मेलनले नयाँ गति दिने अपेक्षा गरिएको छ।
