काठमाडौं — नेपालभर यतिबेला ‘बटरफ्लाई म्याराथन २०२५’ चलिरहेको छ । प्रारम्भमा कार्यक्रम मार्च ३१ सम्म सीमित गर्ने योजना भए तापनि, सहभागीहरूको चासो र मागलाई मध्यनजर गर्दै कार्यक्रमलाई अप्रिल महिनाको अन्त्यसम्म विस्तार गरिएको आयोजकले जानकारी दिएको छ ।
पुतली संरक्षण र जैविक विविधताको प्रवर्द्धन गर्ने उद्देश्यले सुरु गरिएको यो अभियानले सहभागीहरूलाई देशभरि पाइने विभिन्न पुतली प्रजातिहरूको फोटो खिच्न, अभिलेख राख्न, र वैज्ञानिक तथ्यांक संकलन गर्न प्रेरित गर्छ।
उक्त अभियान ‘बिग बटरफ्लाई काउन्ट नेपाल’ अन्तर्गत सञ्चालित नागरिक विज्ञान कार्यक्रम हो, जसले पुतलीको जैविक विविधता, तिनीहरूको संरक्षण, पहिचान, र खतरामा परेका प्रजातिहरूप्रति जनचेतना फैलाउने लक्ष्य लिएको छ।
कार्यक्रमको आयोजनामा बटरफ्लाई वाचर्स नेपाल, भक्तपुर जेसीज, र ह्यापी केक्स एन्ड बेकरी को सहकार्य रहेको छ, जसले वातावरणीय चेतना फैलाउने उद्देश्यले विभिन्न क्षेत्रलाई एकै ठाउँमा जोडेको छ।
नेपालमा हालसम्म करिब ६५० भन्दा बढी प्रजातिका पुतली (बटरफ्लाई) पाइएको छ। यी पुतलीहरू नेपालका विभिन्न भू-भागहरूमा—तराई, पहाड, हिमाली क्षेत्र हुँदै उच्च हिमालसम्म—फैलिएर रहेका छन्। नेपालको भौगोलिक विविधता, जलवायुको फरकपन, र जैविक वातावरणले पुतलीहरूको लागि उत्कृष्ट बासस्थान प्रदान गरेको छ।
तस्वीरहरू: सुशील श्रेष्ठ/अन्नपूर्ण टाइम्स
