काठमाडौं : सिन्धुपाल्चोक बाह्रबिसे नगरपालिका-९ की २९ वर्षीया एक सुत्केरीको कोरोनाले मृत्यु भएपछि तीन वडा सिल गर्ने निर्णय गरेको छ। जिल्ला विपद् व्यवस्थापन समिति सिन्धुपाल्चोकले बाह्रविसे नगरपालिकाको वडा नं ९ राम्चे, बलेफी गाउँपालिकाको ७ र ८ सिल गर्ने निर्णय गरेको जिल्ला समन्वय समितिका प्रमुख कृष्णगोपाल तामाङले जानकारी दिए।
‘बाह्रबिसे नगरपालिकाको ९ नम्बर वडा राम्चे तथा बलेफि गाउँपालिकाको वडा नम्बर ८ र ९ माइती गाउँलाइ सिल गरी कसैलाई बाहिर आउन र वडाभित्र जान नदिने। साथै उक्त क्षेत्रका बासिन्दालाई घर बाहिर निक्लिन दिने। सिल गर्न नेपाल प्रहरी, सशस्त्र प्रहरी र नेपाली सेनालाई अनुरोध गर्ने’ समितिको बैठकमा निर्णय भएको छ। त्यस्तै उक्त महिला बाह्रबिसे प्राथमिक स्वास्थ्य केन्द्रमा पनि उपचारका लागि गएकाले स्वास्थ्य केन्द्र पनि सिल गर्ने निर्णयमा उल्लेख छ।
शनिबार दिउँसो मृतकको श्रीमान, सासु र नन्दको स्वाब संकलन गरिएको छ। वैशाख २३ गते टिचिङ अस्पतालमा भर्ना भएर २४ गते सुत्केरी भएपछि उनी २५ गते डिस्चार्ज भएर घर गएकी थिइन्।