बर्दघाट, नवलपरासी — बर्दघाटस्थित ब्राइट करियर ट्रेनिङ सेन्टर प्रा. ली.ले शनिबार नगरमै पहिलोपटक मन्टेश्वरी तथा इसिडी (अर्ली चाइल्डहुड डेभलपमेन्ट) तालिम कार्यक्रम सम्पन्न गरेको छ। तालिममा नगर क्षेत्रका विभिन्न ९ विद्यालयमा कार्यरत ६० जना महिला शिक्षकहरूको उत्साहजनक सहभागिता रहेको थियो।
तालिमको उद्देश्य बालबालिकाको सर्वाङ्गिण विकासमा केन्द्रित दक्ष तथा प्रभावकारी मन्टेश्वरी शिक्षक उत्पादन गर्नु रहेको आयोजक पक्षले जनाएको छ।
कार्यक्रमका अध्यक्ष थम बहादुर अधिकारीले शिक्षण सिकाइलाई व्यवहारिक र प्रभावकारी बनाउने दिशामा तालिमले महत्वपूर्ण योगदान दिने विश्वास व्यक्त गर्नुभयो। उहाँले बालमैत्री पद्धतिमा आधारित शिक्षाको आवश्यकता आजको युगमा झन् बढ्दै गएको उल्लेख गर्नुभयो।
ब्राइट करियर ट्रेनिङ सेन्टर प्रा. ली.का म्यानेजिङ डिरेक्टर राज अधिकारीका अनुसार विपन्न वर्गका महिलाहरूलाई लक्षित गरी विशेष सहुलियतमा तालिम प्रदान गरिँदै आएको छ। “सिप सिकेर स्वरोजगार बन्न चाहने महिलाका लागि हाम्रो संस्था एक अवसर हो,” उहाँले भन्नुभयो।
उक्त तालिमले बालमैत्री शिक्षा प्रणालीलाई स्थानीय विद्यालयमा प्रभावकारी रूपमा कार्यान्वयन गर्न सहयोग पुग्ने अपेक्षा गरिएको छ।
