राहुल गुप्ता, वीरगन्ज – पर्सा जिल्लाबाट निर्वाचित साँसदहरुद्वारा पर्सा जिल्लाको लागि कोरोना संकटको सामना गर्नका लागि बिशेष प्याकेजको माग गरेका छन् । पर्सा क्षेत्र नम्बर १ बाट निर्वाचित साँसद प्रदिप यादव र क्षेत्र ४ बाट निर्वाचित लक्षमणलाल कर्णले आइतवार उपप्रधानमन्त्री तथा परराष्ट्र मन्त्री इश्वर पोखरेललाई भेंटेर आफ्नो माग राखेका हुन । सरकारको तर्फबाट कोरोना सम्बन्धमा संयोजनको भुमिकामा हरेका संघीय सरकारका उपप्रधानमन्त्री पोखरेलले वीरगन्ज मुलुकमै सबभन्दा बढी जोखिमको क्षेत्र भएकोले त्यहाँ चाहिने साधनस्रोत अबिलम्ब उपलब्ध गराउने प्रतिबद्धता दिएको साँसद यादवले बताए ।
वीरगन्जमा ठुलो आकारको बृहद र सुबिधासम्पन्न बेग्लै कोरोना अस्पताल बैकल्पिक रुपमा सुरु गर्ने, पिसिआर परिक्षणको दायरा बढाउनका लागि आवश्यक किट पर्याप्त संख्यामा उपलब्ध गराउन, अस्पताल भर्ना हुने संक्रमितहरुको उपचार, खाना तथा अन्य सुबिधा बिश्व स्वास्थ्य संगठनको मापदण्डमा अबिलम्ब सुरु गराउन र वीरगन्जमा जारी लकडाउन र निषेधाज्ञाले यहाँको जनजीवन कष्टकर बनेकोले उचित ब्यवस्थापन गर्न लगायतका माग साँसदहरुले राखेका थिए ।
वीरगन्जको नारायणी अस्पतालमा सरकारले अहिलेसम्म कोभिड अस्पताल संचालन गरे पनि त्यसको क्षमताभन्दा बढी संक्रमित फेला परेका कारण यहाँ ब्यवस्थापनमा चुनौति देखिएको छ ।
