रसुवा — स्थानीय संस्कृति र परम्पराको प्रवर्द्धन गर्ने उद्देश्यले गाउँ पर्यटन प्रवर्द्धन मञ्च-नेपाल (भिटोफ-नेपाल) र कालिका गाउँपालिका, रसुवाले संयुक्त रूपमा रोपाइँ महोत्सव–२०८२ भव्य रूपमा सम्पन्न गरेका छन्।
‘समुन्नत नेपालको प्राथमिक आधार, पर्यटन र कृषि नेपाली अर्थतन्त्रका जराधार’ भन्ने नारासहित कालिका गाउँपालिका–५, जिबजिबे, गैरीगाउँमा आयोजित उक्त महोत्सवले कृषि तथा ग्रामीण पर्यटनको महत्त्वलाई उजागर गरेको छ। हरेक वर्षझैँ यस वर्ष पनि परम्परागत शैलीमा रोपाइँ, दोहोरी, स्थानीय भाका, जातीय पोशाक, र मौलिक परिकारको प्रदर्शनीसहित महोत्सव मनाइएको हो।
महोत्सवमा स्थानीय बासिन्दा, आन्तरिक पर्यटक तथा विभिन्न क्षेत्रका पाहुनाहरूको उल्लेख्य सहभागिता देखिएको थियो। महोत्सवका संयोजक तथा भिटोफ-नेपालका द्वितीय उपाध्यक्ष मनहरि दाहालले कृषि र पर्यटनलाई समेट्दै ग्रामीण अर्थतन्त्र सुदृढ बनाउन यस्ता कार्यक्रमहरू आवश्यक रहेको जानकारी दिए ।
