काभ्रेपलान्चोक – बनेपा नगरपालिका–१० बास्डोल र पनौती नगरपालिका– ४ चामखरको सिमानामा अवस्थित जन्ते ढुङ्गा हाल आन्तरिक पर्यटकहरूको आकर्षक गन्तव्यका रूपमा चर्चामा आएको छ। विशेषगरी बिदाका दिनमा यहाँको शान्त वातावरण र प्राकृतिक सौन्दर्यको मजा लिन पर्यटकहरूको भीड लाग्ने गरेको छ।
हरियो चौर र डाँडासहितको जन्ते ढुङ्गा वरिपरिको सुन्दर दृश्य, ढुङ्गाको अनौठो आकार र यससँग जोडिएका लोककथाले पनि आगन्तुकलाई आकर्षित गर्छ। हालै सामाजिक सञ्जालमा यहाँका तस्बिरहरू भाइरल भएपछि दैनिक सयौं मानिस घुम्न आउने गरेका छन्।
पर्यटक चहलपहल बढेसँगै स्थानीयहरूले अस्थायी पसल सञ्चालन गर्न थालेका छन्, जसले घुम्न आउनेहरूलाई सहजता भएको छ भने स्थानीयको आय आर्जन पनि बढेको छ। तर, भीडसँगै फोहर व्यवस्थापन चुनौती बनेको छ। यसका लागि चामखर एकीकृत युवा समूहले डस्टबिन राख्नुका साथै विभिन्न स्थानमा फोहर नफाल्न सूचना बोर्डहरू स्थापना गरेको छ।
मनसुनको मौसममा झनै हरियालीले भरिपूर्ण देखिने यो स्थानबाट वरिपरिका पहाडी भूभाग र प्राकृतिक सुन्दरता अवलोकन गर्न सकिन्छ। प्रकृति र शान्त वातावरणको खोजीमा हुनुहुन्छ भने जन्ते ढुङ्गा एकपटक अवश्य भ्रमण गर्नुपर्ने स्थान हो।
