काठमाडौं – सामरी इन्टरनेशनलको आयोजनामा ‘मिसेस नेपाल इन्टरनेशनल वर्ल्ड २०२५’ को पहिलो अडिसन शनिबार राजधानीको मण्डला ब्याङ्क्वेट, तिनकुनेमा सम्पन्न भएको छ।
कार्यक्रममा २६ जना प्रतिस्पर्धीहरूले आफ्नो लुकेको प्रतिभा, आत्मविश्वास र व्यक्तित्व प्रस्तुत गर्दै उपस्थित दर्शक र निर्णायकलाई प्रभावित पारेका थिए । रक्षाबन्धनको दिन आफ्ना व्यक्तिगत जिम्मेवारी पूरा गरेर अडिसनमा सहभागी भएका महिलाप्रति सामरी इन्टरनेशनलका मुख्य कार्यकारी अधिकृत भरत सामरीले घर–परिवार मात्र नभई समाजमा अग्रसर हुने हरेक महिलालाई मनदेखि सम्मान रहेको बताएका थिए ।
निर्णायक मण्डलमा चर्चित गायिका सुनीता दुलाल, निर्देशक तथा अभिनेत्री एलिजा गौतम, र्यापर निर्णय NSK, वरिष्ठ पत्रकार हरी गोपाल प्रधान, मनास्लु वर्ल्ड कलेजका कार्यकारी अध्यक्ष ग्येन्द्र लामा तथा पूर्व अध्यक्ष एवं HLC सदस्य (NRNA ICC) विनोद कुँवर रहेका थिए।
आयोजक तथा सहयोगी टोलीमा दिल माया मगर (प्रमुख कार्यकारी, MKM फेसन हाउस), महेन्द्र शाही (प्रबन्ध निर्देशक), सुस्मिता तिमल्सिना र अनिशा (संयोजक) सहितका सदस्यहरूको सक्रिय भूमिका रहेको थियो। कार्यक्रममा महेन्द्र शाहीले सञ्चालन गरेका थिए।
अन्तिम अडिसन आगामी श्रावण ३१ गते बिहान १०:०० बजे मण्डला ब्याङ्क्वेट, तिनकुनेमा हुने आयोजकले जानकारी दिएका छन्।
