काठमाडौं – पहिलो मनोरञ्जन फुटसल लिग–२०८२ को उपाधि लायन एफसी ‘बी’ले हात पारेको छ ।
शनिबार राजधानीको इलाइट फुटसलमा सम्पन्न लिगमा लायन एफसी ‘बी’ गोल अन्तरको आधारमा शिलापत्र एफसीलाई पछि पार्दै विजेता बनेको हो ।
लिगको सुरुवाती खेलमै लायन ‘बी’सँग पराजित भएको शिलापत्रले त्यसपछि लगातार दुई खेलमा जित र एक खेलमा बराबरी गर्दै शीर्षस्थानमा उक्लिएको थियो । तर अन्तिम खेलमा लायन ‘ए’लाई लायन ‘बी’ले ८ गोलको फराकिलो अन्तरले हराएपछि शिलापत्र गोल अन्तरमै पछि पर्न बाध्य भयो र उपविजेतामा सीमित रह्यो ।
विजेता लायन एफसी ‘बी’ले एक खेलमा हार, एकमा बराबरी र दुई खेलमा जित निकाल्दै उपाधि जितेको हो ।
विजेता र उपविजेता टोलीलाई प्रमुख अतिथि प्रतिनिधिसभा सदस्य एवं पूर्व श्रम, रोजगार तथा सामाजिक सुरक्षामन्त्री शेरबहादुर कुँवर र उदयपुरे फुड प्रडक्टका अध्यक्ष धिरज श्रेष्ठ (पूर्ण) ले ट्रफी तथा प्रमाणपत्र प्रदान गरे ।
‘स्वास्थ्यका लागि खेलकुद’ भन्ने मूल नारासहित लायन एफसीद्वारा आयोजित प्रतियोगितामा पाँच टोलीको सहभागिता रहेको थियो । लिग प्रणालीमा खेलाइएको उक्त प्रतियोगितामा अंकतालिकाको शीर्ष स्थानमा रहने टोलीलाई विजेता घोषित गरिएको थियो ।
प्रतियोगिताका संयोजक इन्द्र लामाले प्रतियोगिता सफल बनाउन सहयोग गर्ने प्रायोजक, सहभागी टोली र खेल हेर्न आउने खेलप्रेमी दर्शकप्रति हार्दिक आभार प्रकट गरे ।
