काठमाडौँ — भाद्र १७ गतेदेखि सुरु भएको प्रधान सेनापति ट्रफी–२०८२ खेलकुद प्रतियोगिता आज समापन भएको छ। कार्यक्रमको प्रमुख आतिथ्य प्रधान सेनापति अशोक राज सिग्देलले गर्नुभएको थियो।
समापनमा भएको फुटबलको फाइनलमा कालीबहादुर गणले देवीदल गणलाई ३–२ गोल अन्तरले पराजित गर्दै ट्रफी उचाल्न सफल भयो।
एथलेटिक्स, स्विमिङ, बक्सिङ, तेक्वान्दो, जुडो, भलिबल, बास्केटबल र फुटबलसमेत समावेश प्रतियोगितामा जम्मा १४ टिमको सहभागिता रहेको थियो।
समग्र नतिजामा उपत्यका पृतना प्रथम र श्री नं. १६ बाहिनी अड्डा द्वितीय बने। गणतर्फ पुरानो गोरख गणले प्रथम र श्री जगदल गणले द्वितीय स्थान हात पारे।
विजयी टिम तथा उत्कृष्ट खेलाडी/रेफ्रीहरुलाई प्रधान सेनापति, पूर्व प्रधान सेनापतिहरू, राष्ट्रिय खेलकुद परिषद्का सदस्य–सचिव, बलाध्यक्ष, सशस्त्र प्रहरी महानिरीक्षक र राष्ट्रिय अनुसन्धान विभागका प्रमुख अनुसन्धान निर्देशकले ट्रफी, प्रमाणपत्र र नगद पुरस्कार प्रदान गरे।
समारोहमा पूर्व प्रधान सेनापति, अन्य सुरक्षा निकायका प्रमुख, बहालवाला तथा अवकाश प्राप्त रथीबृन्द, राष्ट्रिय खेलकुद परिषद् तथा विभिन्न खेल सङ्घका पदाधिकारी, सैनिक श्रीमती संघकी अध्यक्ष, पदाधिकारीहरू, सैनिक सहचारीहरू तथा सञ्चारकर्मीहरूको उपस्थिती रहेको थियो।
