काठमाडौं – नेपालले युनिटी कप टी–२० अन्तर्राष्ट्रिय क्रिकेट सिरिजमा वेष्टइण्डिजलाई दोस्रो खेलमै पराजित गर्दै ऐतिहासिक सिरिज उपाधि जितेको छ ।
सोमबार शारजाहमा भएको खेलमा नेपालले ९० रनले विजयी हुँदै तीन खेलको सिरिज २–० ले आफ्नो पक्षमा पार्दै एक खेल अगावै उपाधि हात पारेको हो ।
टस जितेर पहिला ब्याटिङ गरेको नेपालले निर्धारित २० ओभरमा ६ विकेट गुमाउँदै १७३ रनको योगफल बनाएको थियो । नेपालका ओपनर आसिफ शेखले ४७ बलमा ८ चौका र २ छक्कासहित अविजित ६८ रन प्रहार गरे भने सन्दीप जोराले ३९ बलमा ५ छक्का र ३ चौकासहित ६३ रन बनाए । दुवै बीच चौथो विकेटका लागि १०० रनको शतकीय साझेदारी भयो, जुन नेपालको टी–२० आईमा चौथो विकेटको उच्च साझेदारी हो ।
१७४ रनको लक्ष्य पछ्याएको वेष्टइण्डिज १७.१ ओभरमै ८३ रनमा अलआउट भयो । नेपालका आदिल आलमले ४ ओभरमा २४ रन खर्चेर ४ विकेट लिँदै बलिङतर्फ उत्कृष्ट प्रदर्शन गरे । कुशल भुर्तेलले ३, ललित राजवंशी, करण केसी र दीपेन्द्रसिंह ऐरीले समान १–१ विकेट लिए ।
युनिटी कपको पहिलो खेलमा पनि नेपालले वेष्टइण्डिजलाई १९ रनले हराएको थियो । यससँगै नेपालले आफ्नो क्रिकेट इतिहासमा पहिलो पटक टेस्ट टोलीविरुद्ध टी–२० अन्तर्राष्ट्रिय सिरिज जितेको गौरव हासिल गरेको छ ।
सिरिजको तेस्रो र अन्तिम खेल मंगलबार हुनेछ ।
