काठमाडौं – कार्तिक कृष्ण प्रतिपदाको अवसरमा आज हाडीगाउँका स्थानीयले परम्परागत चोक्ते नारायणको जात्रा मनाएका छन्। उल्टो रथमा देवतालाई राखेर परिक्रमा गराउने अनौठो चलनका कारण यसलाई ‘कहीँ नभएको जात्रा हाडीगाउँमा’ भनेर पनि चिनिन्छ।
परम्पराअनुसार, पूर्णिमाको दिन साँझ देवतालाई मन्दिरबाट निकालेर आँगनमा राखी भक्तजनलाई दर्शन गराउने र आज (प्रतिपदा) का दिन तीनवटा रथमा विराजमान गराई हाडीगाउँ परिक्रमा गराउने प्रचलन छ।
दसैँ सकिएपछि मनाइने यो चोक्ते नारायण जात्राको मुख्य आकर्षण भनेकै रथको विशेष संरचना हो—गजुर तल र देवता माथि राखिएको उल्टो रथ, जसले यो जात्रालाई अनौठो र अद्वितीय बनाएको छ।
