काठमाडौं — जेन–जी आन्दोलनका क्रममा कुल ६१ जना भीआईपीको हवाई उद्धार गरिएको नेपाली सेनाले जनाएको छ। सेनाले शुक्रबार आयोजित पत्रकार सम्मेलनमार्फत भदौ २३ गतेको जेन–जी आन्दोलन र त्यसपछिका घटनाक्रमबारे विस्तृत जानकारी सार्वजनिक गरेको हो।
सेनाका युद्धकार्य निर्देशक अनुपजंग थापाका अनुसार, आन्दोलनका क्रममा नेपाल प्रहरीका २३ कर्मचारीसहित कुल १९० जना भीभीआईपी, भीआईपी तथा उनीहरूका परिवारलाई सेनाले सुरक्षित स्थानमा पुर्याएको थियो। तीमध्ये ६१ जनालाई हेलिकप्टरमार्फत उद्धार गरिएको र १२९ जनालाई स्थलमार्गबाट सुरक्षासहित सुरक्षित स्थानमा लगिएको उनले जानकारी दिए।
थापाले सेनाको प्राथमिकता जनधनको सुरक्षा र राष्ट्रिय एकता रहेको स्पष्ट पारे। उनले भने, “सेनाले घातक शक्ति प्रयोग नगरेको भन्ने कुरा सुन्नमा आएको छ, तर हाम्रो स्पष्ट प्राथमिकता जनधनको सुरक्षा र राष्ट्रिय एकता नै थियो।”
सेनाका अनुसार, आन्दोलनका क्रममा तत्कालीन प्रधानमन्त्री केपी शर्मा ओली, कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाललगायत शीर्ष नेता, मन्त्री तथा तिनका परिवारलाई पनि उद्धार गरी सुरक्षित ब्यारेकमा लगिएको थियो।
युद्धकार्य विभागका प्रमुख उपरथी अनुपजंग थापाले पत्रकार सम्मेलनमा भने, “अहिले नै हामीले के–के कार्य गर्यौं भन्ने कुरा त्यति महत्वपूर्ण नलागे पनि आउँदा दिनमा ती सबै विवरण स्पष्ट हुनेछ।”
सेनाले आन्दोलनका क्रममा केही महत्वपूर्ण संरचनाको पनि सुरक्षा गरेको बताएको छ। जेन–जी आन्दोलनबाट उत्पन्न घटनामा ७६ जनाको मृत्यु भएको पुष्टि गरिएको छ।
