काठमाडौँ — राष्ट्रिय प्रजातान्त्रिक पार्टी (राप्रपा) ले समानुपातिकतर्फको बन्दसूचीमा खस आर्य समूहका पहिलो तीन उम्मेदवार प्रजातान्त्रिक विधिबाट चयन गरेको छ। आज बसेको कार्यसम्पादन समिति बैठकमा मतदानमार्फत शीर्ष तीन उम्मेदवारको टुंगो लगाइएको हो।
मतदानमा सर्वाधिक मत प्राप्त गर्दै मधेस प्रदेश प्रमुख तथा कार्यसम्पादन समिति सदस्य भरत गिरी खस आर्यतर्फ पहिलो नम्बरमा परेका छन्। दोस्रो नम्बरमा धार्मिक क्षेत्रको प्रतिनिधित्व गर्दै राप्रपाको धर्म–संस्कृति विभाग तथा धार्मिक संगठनका प्रमुख पुष्पराज पुरुष चयन भएका छन्।
यसैगरी, सुदूरपश्चिम प्रदेश प्रमुख धर्मराज जोशी तेस्रो नम्बरमा रहेका छन्। पार्टीले समानुपातिक उम्मेदवार छनोटमा लोकतान्त्रिक अभ्यासलाई प्राथमिकता दिएको भन्दै नेतृत्वले यस निर्णयलाई पारदर्शी र विधिसम्मत प्रक्रिया भएको बताएको छ।
