काठमाडौं – ३०४ औँ पृथ्वी जयन्ती तथा राष्ट्रिय एकता दिवस–२०८२ विभिन्न कार्यक्रमसहित मनाउने सिलसिलामा नेपाल एकीकरणका क्रममा प्रयोग भएको ऐतिहासिक गोरखा–काठमाडौँ एकीकरण मार्ग पदयात्रा आज गोरखा दरबारबाट शुभारम्भ भएको छ।
आज मिति २०८२ पौष २१ गते आयोजित शुभारम्भ कार्यक्रममा गोरखा जिल्ला न्यायाधीश, जिल्ला समन्वय समितिका प्रमुख, गोरखा नगरपालिकाका प्रमुख, पश्चिम पृतनाका पृतनापति, प्रमुख जिल्ला अधिकारी, स्थानीय जनप्रतिनिधि, जिल्ला स्थित सरकारी कार्यालय तथा सुरक्षा निकायका प्रमुख तथा प्रतिनिधि, विभिन्न संघ–संस्थाका प्रतिनिधि, सञ्चारकर्मी तथा सर्वसाधारणको उल्लेखनीय उपस्थिति रहेको थियो।
पदयात्रामा नेपालको राष्ट्रिय झण्डा, नेपाली सेनामा सबैभन्दा पहिले खडा भएका पाँच कम्पनी— श्रीनाथ, कालीबक्स, बर्दवाणी, पुरानो गोरख र सबुज —का झण्डा तथा टर्चसहित ऐतिहासिक सैनिक पोसाक र परम्परागत बाजागाजासहितको टोली सहभागी रहेको छ। उक्त टोली गोरखा जिल्लामा तैनाथ श्री रुद्रध्वज गण बाट सहभागी भएको हो।
गोरखा दरबारबाट सुरु भएको पदयात्रा धादिङ र नुवाकोट हुँदै काठमाडौंको हनुमानढोका पुग्नेछ। पदयात्राको समापन आगामी पौष २७ गते जङ्गी अड्डामा आयोजना हुने विशेष समारोह का बीच गरिने कार्यक्रम रहेको छ।
यसैबीच, पृथ्वी जयन्ती तथा राष्ट्रिय एकता दिवस–२०८२ को अवसरमा पौष २७ गते जङ्गी अड्डास्थित सभामण्डपमा राष्ट्र निर्माता श्री ५ बडामहाराजाधिराज पृथ्वीनारायण शाहको योगदान सम्बन्धी प्रवचन, लघु नाटक तथा वृत्तचित्र प्रदर्शनी, कविता प्रतियोगिता लगायत विविध कार्यक्रमहरू आयोजना गरिने छन्।
पृथ्वी जयन्ती तथा राष्ट्रिय एकता दिवसलाई भव्य रूपमा मनाउने उद्देश्यले देशभर तथा विदेशमा तैनाथ नेपाली सेनाका विभिन्न इकाइहरूमा समेत विविध कार्यक्रमहरू सञ्चालन भइरहेका छन्।
