काठमाडौं – अमेरिकाका राष्ट्रपति डोनाल्ड ट्रम्पले भारतले रुसबाट तेल खरिद कम नगरे भन्सार शुल्क (ट्यारिफ) बढाउने चेतावनी दिएका छन्। आइतबार पत्रकारहरूसँग बोल्दै उनले भारतीय प्रधानमन्त्री नरेन्द्र मोदीलाई ‘राम्रो मान्छे’ भने पनि आफू खुसी नभएको बताएका हुन्।
ट्रम्पका अनुसार मोदीले रुसबाट तेल नकिन्ने आश्वासन दिए पनि त्यसको कार्यान्वयन नभएको गुनासो उनले गरेका छन्। यद्यपि अन्तर्राष्ट्रिय समाचार संस्था रोयटर्सले ट्रम्प–मोदी भेटमा उक्त विषयमा औपचारिक छलफल नभएको जनाएको छ।
यस विषयमा भारतको वाणिज्य मन्त्रालयले हालसम्म कुनै प्रतिक्रिया दिएको छैन। ट्रम्पको पछिल्लो टिप्पणीले भारत–अमेरिका सम्बन्धमा नयाँ कूटनीतिक तनावको संकेत गरेको छ।
रुस भारतको सबैभन्दा ठूलो तेल आपूर्तिकर्ता हो। यसअघि ट्रम्प प्रशासनले रुसी तेल व्यापारबाट युक्रेन युद्धमा सहयोग पुगेको आरोप लगाउँदै आएको छ। अगस्ट २०२५ मा अमेरिकी बजारमा भारतीय वस्तुहरूमा ५० प्रतिशत ट्यारिफ लाग्दा भारतको निर्यात क्षेत्रमा ठूलो असर परेको थियो।
