काठमाडौं – जेनजी अगुवा रक्षा बमले नेपाली कांग्रेसमा विशेष महाधिवेशन अपरिहार्य भएको दाबी गरेकी छन्। उनले नियमित महाधिवेशनको नाममा यथास्थितिवाद रोज्ने नेताहरूले जेनजी आन्दोलन र परिवर्तनको आवाजलाई अस्वीकार गरिरहेको आरोप लगाएकी छन्।
भदौ २३ को घटनालाई जनआक्रोशको परिणाम भन्दै उनले त्यसमा कांग्रेस पनि जिम्मेवार रहेको उल्लेख गरिन्। पार्टीभित्र विशेष कि नियमित महाधिवेशन भन्ने बहस तीव्र भइरहेका बेला उनले विशेष महाधिवेशनमार्फत असाधारण राजनीतिक संकटको समाधान खोज्नुपर्ने बताइन्।
यथास्थितिवादले देशलाई ‘मास डिप्रेसन’तर्फ धकेल्ने खतरा रहेको चेतावनी दिँदै उनले कांग्रेसले युवापुस्ताको भरोसा जित्ने कि गुमाउने भन्ने निर्णय यहीँबाट हुने बताइन्। चुनाव नजिकिँदै गएको सन्दर्भमा मतदाता परिवर्तनको पक्षमा तयार रहेको उनको भनाइ छ।
