काठमाडौं – नेपाली कांग्रेसका नेता एवं पूर्वमन्त्री दीपक खड्काले नेपाली कांग्रेसको चुनाव चिह्न रुखबाहेक अन्य कुनै विकल्प अस्वीकार्य हुने स्पष्ट पारेका छन् ।
सामाजिक सञ्जालमार्फत् धारणा सार्वजनिक गर्दै उनले आफू बीपी कोइरालालाई आदर्श र मार्गदर्शक मानेर राजनीतिमा आएको उल्लेख गरेका छन् । “बीपी कोइरालाले जन्माउनुभएको रुख चुनाव चिह्न र चारतारे झण्डाबाहेक अरु सोच्न वा कल्पना गर्न मात्र होइन, हामी सबै सक्दैनौँ,” खड्काले लेखेका छन् ।
उनले प्रतिनिधिसभा निर्वाचनका लागि मनोनयन दर्ता गर्ने जानकारी दिँदै संखुवासभाका नेता तथा कार्यकर्तालाई मंगलबार बिहान १० बजे खादबारीमा उपस्थित हुन आग्रह गरेका छन् ।
यता निर्वाचन आयोगले दोस्रो विशेष महाधिवेशनबाट निर्वाचित कार्यसमितिलाई मान्यता दिएपछि देउवा समूहले सर्वोच्च अदालतमा रिट दर्ता गरेको छ । रिट दर्ता भए पनि देउवा समूहका नेताहरूले रुख चुनाव चिह्नबाहेक अन्य विकल्पबाट चुनाव नलड्ने अडान दोहोर्याउँदै पार्टी एकतामा जोड दिएका छन् ।
