काठमाडौं – महानगरीय प्रहरी वृत्त स्वयम्भूको जुनियर अधिकृत ब्यारेकमा गोली चलेको छ । गोली लागेर प्रहरी सहायक निरीक्षक (असई) विष्णुबहादुर कार्कीको निधन भएको छ । मृतक असई स्वयंभु स्थित हलचोक प्रहरी बिटका इन्चार्ज हुन् ।
महानगरीय प्रहरी परिसर काठमाडौंका प्रवक्ता राजकुमार केसीका अनुसार स्वयम्भू वृत्त मातहतको हल्चोक बिटमा कार्यरत रहेका कार्की बिहान अबेरसम्म नउठेपछि उनका सहकर्मीले झ्यालबाट हेर्दा टाउकामा रगत आएको अवस्था पल्टिरहेको देखेका थिए।
त्यसपछि ढोकाको चुकुल फोडेर प्रहरी भित्र प्रवेश गरेको थियो। उनको कन्चटमा गोली लागेको जस्तो देखिएको केसीको भनाई छ।
फरेन्सिक विज्ञसहितको टोली अहिले घटनास्थल गएर घटनाको अध्ययन गरिरहेको छ। ढोका लगाएको अवस्थामा मृत भेटिएकाले आत्महत्या गरेको हुनसक्ने प्रहरीको आशंका छ।
