बर्दघाट, नवलपरासी पश्चिम — बर्दघाट नगरपालिकामा इलाका प्रहरी कार्यालयको आयोजनामा निर्वाचन प्रहरी लक्षित सर्पदंश रोकथाम तथा व्यवस्थापन सम्बन्धी चेतनामूलक तालिम कार्यक्रम सम्पन्न भएको छ।
कार्यक्रममा संरक्षणकर्मी तथा फोटोपत्रकार राज अधिकारी र सर्प उद्धारकर्मी तथा समाजसेवी दुर्गा लामिछाने ले सर्प पहिचान, विषालु तथा अविषालु सर्पको फरक, सर्पदंशपछि अपनाउनुपर्ने प्राथमिक उपचार र सुरक्षित व्यवस्थापनका उपायबारे प्रशिक्षण दिनुभयो।
तालिममा २४७ जना निर्वाचन प्रहरीको सहभागिता रहेको थियो। सहभागीहरूलाई सर्पदंशका घटनामा घाइतेको सुरक्षित उद्धार, समयमै स्वास्थ्य संस्थामा पुर्याउने प्रक्रिया तथा अफवाहबाट जोगिने उपायबारे व्यावहारिक जानकारी प्रदान गरिएको थियो।
इलाका प्रहरी कार्यालय, बर्दघाटका इन्स्पेक्टर कृष्ण डाङ्गीले यस्ता तालिमको महत्वबारे प्रकाश पार्दै सर्प संरक्षणमा सक्रिय अधिकारी र लामिछानेको कार्यको प्रशंसा गर्नुभयो। उहाँले तराई क्षेत्रमा सर्पदंशका घटना तुलनात्मक रूपमा बढी हुने भएकाले सुरक्षाकर्मीहरू सचेत र सक्षम हुनु अत्यावश्यक रहेको बताउनुभयो।
कार्यक्रमका वक्ताहरूले यस्ता सचेतनामूलक पहलहरूले सर्प र मानवबीचको द्वन्द्व न्यूनिकरण गर्न, सर्पदंशबाट हुने क्षति कम गर्न तथा सर्प संरक्षणमा टेवा पुर्याउन महत्त्वपूर्ण भूमिका खेल्ने उल्लेख गरे। विशेषगरी तराई क्षेत्रका स्थानीय तहमा नियमित रूपमा सर्पदंश सचेतना कार्यक्रम आयोजना गर्नुपर्नेमा जोड दिइएको थियो।
