नागदह ललितपुर महानगरभित्र अवस्थित एक शान्त र रमणीय प्राकृतिक गन्तव्य हो। हरियालीले ढाकिएको वन क्षेत्र, सिमसारको जैविक विविधता र तालजस्तो दृश्यले यहाँ पुग्ने जो–कोहीलाई आनन्दित बनाउँछ। शहरको भीडभाडबाट केही समय टाढा रही शान्ति खोज्नेहरूका लागि नागदह उत्कृष्ट रोजाइ मानिन्छ।
यस क्षेत्रलाई विशेषगरी चराचुरुङ्गी अवलोकन, प्रकृतिसँग नजिकिन चाहने घुमन्ते र फोटोग्राफरहरूले रुचाउने गरेका छन्। बिहानको कुहिरो, पानीमा पर्ने हरियालीको प्रतिबिम्ब र चराहरूको चहलपहलले नागदहलाई अझ आकर्षक बनाउँछ।
स्थानीय जनविश्वासअनुसार नागदहसँग धार्मिक तथा सांस्कृतिक महत्व पनि जोडिएको छ, जसले यसलाई प्राकृतिक मात्र होइन, आस्थाको केन्द्रका रूपमा पनि परिचित गराएको छ। उचित संरक्षण र प्रवर्द्धन गर्न सके नागदह पर्यटकीय दृष्टिले अझ महत्वपूर्ण गन्तव्य बन्न सक्ने सम्भावना बोकेको छ। तस्विर : टार्जन लिम्बु -नेपाल न्यूज बैंक
