काठमाडौं – आगामी जेठ १५ गते मनाइने गणतन्त्र दिवस समारोहमा प्रधानमन्त्री बालेन्द्र शाह ले सम्बोधन नगर्ने भएका छन्। प्रधानमन्त्री तथा मन्त्रिपरिषद् कार्यालयले समारोहमा सम्बोधनका लागि रामचन्द्र पौडेल लाई अनुरोध गर्दै राष्ट्रपति कार्यालय शीतलनिवासमा पत्राचार गरेको स्रोतले जनाएको छ।
स्रोतका अनुसार मन्त्रिपरिषद् बैठकले नै यस विषयमा राष्ट्रपतिलाई अनुरोध गर्ने निर्णय गरेको थियो। सोही निर्णयअनुसार मुख्य सचिव सुमनराज अर्याल ले राष्ट्रपति कार्यालयमा पत्र बुझाएका हुन्।
प्रधानमन्त्री कार्यालयले अनौपचारिक रूपमा पनि राष्ट्रपतिलाई सम्बोधन गर्न आग्रह गरिरहेको बताइएको छ। गणतन्त्रको प्रतीक राष्ट्रपतिलाई नै समारोहमा सम्बोधन गराउनु उपयुक्त हुने प्रधानमन्त्री कार्यालयको तर्क रहेको स्रोतको भनाइ छ।
राष्ट्रपति कार्यालयका प्रवक्ता रितेशकुमार शाक्य ले प्रधानमन्त्री कार्यालयबाट पत्र आएको पुष्टि गरेका छन्।
यसअघि काठमाडौं महानगरपालिका का मेयर रहँदा पनि बालेन्द्र शाहले गणतन्त्र दिवसको विशेष समारोह बहिष्कार गर्दै आएका थिए।
