काठमाडौं – सिंहदरबार परिसरभित्र निर्माण भइरहेको नयाँ संघीय संसद् भवनको निर्माण कार्य पूर्ण रूपमा सम्पन्न भएको छ। आधुनिक र भव्य डिजाइनमा तयार पारिएको उक्त भवन अब संसद् बैठक सञ्चालनका लागि पूर्ण रूपमा तयार भएको हो।
भवनको भित्री सजावट (इन्टेरियर) तथा आवश्यक प्राविधिक जडानका कामहरू सकिएसँगै संसद् बैठक सञ्चालनको तयारी अन्तिम चरणमा पुगेको संसद् सचिवालयले जनाएको छ। नयाँ संसद् बैठक कक्षलाई नीलो रङ (Blue Theme) को प्रयोग गरिएको छ। हलभित्र प्रयोग गरिएका पर्दा, भित्ताहरू, कार्पेट तथा सोफाहरू समेत नीलो रङकै रहेका छन् ।
गत भदौ २३ र २४ गते भएको ‘जेनजी आन्दोलन’का क्रममा नयाँबानेश्वरस्थित संघीय संसद् भवनमा आगजनी भई व्यापक क्षति पुगेको थियो। उक्त घटनापछि संसद्का बैठकहरू सिंहदरबारस्थित अस्थायी हलमा सञ्चालन हुँदै आएका थिए।
अब सिंहदरबारभित्रै निर्माण गरिएको यो नयाँ स्थायी हल तयार भएसँगै संसद्का नियमित बैठकहरू यहीँबाट सञ्चालन गरिनेछ। सरकारले आगामी नयाँ आर्थिक वर्षको बजेटसमेत यही नयाँ संसद् भवनबाट सार्वजनिक गर्ने तयारी गरेको छ। संसद् सचिवालय र सम्बद्ध अधिकारीहरूले बजेट भाषण अगावै नयाँ हललाई पूर्ण रूपमा सञ्चालनमा ल्याउन आवश्यक सबै प्राविधिक र व्यवस्थापकीय तयारी तीव्र पारेका छन्।
यो नयाँ भवनको सञ्चालनसँगै नेपाली संसद्ले आफ्नै अत्याधुनिक र सुरक्षित स्थायी संरचना पाउने भएको छ।
