काठमाडौं – रोह्तो मेन्थोलेटम नेपाल प्रालिले महोत्तरीको बलवा नगरपालिका क्षेत्रमा निर्माण गर्न लागिएको आफ्नो नयाँ उत्पादन केन्द्र (फ्याक्ट्री) को भूमिपूजन सम्पन्न गरेको छ। कम्पनीले एक समारोहमार्फत नयाँ उद्योग स्थापनाको औपचारिक सुरुवात गरेको हो।
भूमिपूजन कार्यक्रममा कम्पनीकी प्रबन्ध निर्देशक रान डाङ बिक थाओसहित रोह्तोका उच्च पदस्थ अधिकारी तथा प्रतिनिधिहरूको उपस्थिति रहेको थियो। कम्पनीका अनुसार नयाँ फ्याक्ट्री निर्माणसँगै नेपालमा उत्पादन क्षमता विस्तार, सञ्चालन दक्षता अभिवृद्धि तथा दीर्घकालीन दिगो विकासको लक्ष्यलाई थप सुदृढ बनाइनेछ।
कम्पनीले नयाँ उद्योग स्थानीय उत्पादन प्रवर्द्धन, जिम्मेवार व्यवसायिक अभ्यास तथा आपूर्ति शृङ्खलाको प्रभावकारिता बढाउने दिशामा महत्वपूर्ण कदम हुने जनाएको छ। सञ्चालनमा आएपछि फ्याक्ट्रीले रोजगारी सिर्जना, स्थानीय समुदायको सशक्तीकरण तथा क्षेत्रीय आर्थिक गतिविधिमा योगदान पुर्याउने अपेक्षा गरिएको छ।
रोह्तोले सुरक्षा, वातावरणीय जिम्मेवारी तथा समुदायसँगको सहकार्यलाई प्राथमिकतामा राख्दै उच्च गुणस्तरीय उत्पादन उपलब्ध गराउने प्रतिबद्धता पनि जनाएको छ।
रोह्तो मेन्थोलेटम नेपाल प्रालि जापानको विश्वप्रसिद्ध स्किनकेयर तथा स्वास्थ्य सामग्री उत्पादक कम्पनी Rohto Pharmaceutical Co., Ltd. को सहायक कम्पनी हो। नेपालमा सन् २०१९ देखि सञ्चालनमा रहेको कम्पनीले विभिन्न स्किनकेयर तथा स्वास्थ्यसम्बन्धी उत्पादनहरू उत्पादन तथा वितरण गर्दै आएको छ।
१२५ वर्षभन्दा लामो इतिहास बोकेको रोह्तो फर्मास्युटिकलले औषधि, छाला स्वास्थ्य तथा उपभोक्ता स्वास्थ्य क्षेत्रमा विश्वव्यापी पहिचान बनाएको छ। कम्पनी नवप्रवर्तन, उच्च गुणस्तर र विज्ञानमा आधारित स्वास्थ्य समाधानका लागि परिचित छ।
