काठमाडौं – राष्ट्रिय स्वतन्त्र पार्टी (रास्वपा) का सांसद हरि ढकाल ले राष्ट्रिय मानवअधिकार आयोगको पछिल्लो प्रतिवेदनप्रति असन्तुष्टि जनाउँदै सामाजिक सञ्जालमार्फत प्रतिक्रिया दिएका छन्।
बुधबार साँझ फेसबुकमा स्टाटस लेख्दै उनले महाभारतको प्रसंग उल्लेख गर्दै ‘युद्ध सकिनुअघि कथा लेख्न हतार नगर्न’ आग्रह गरेका हुन्। आयोगले सार्वजनिक गरेको प्रतिवेदनमा रास्वपा सभापति रवि लामिछाने लाई जेनजी आन्दोलनका क्रममा नक्खु कारागारबाट भगाउन भूमिका खेलेको तथा आन्दोलनलाई हिंसात्मक बनाउन संलग्न रहेको आशंकामा थप अनुसन्धान गर्न सिफारिस गरेको थियो।
प्रतिवेदन सार्वजनिक भएपछि सांसद ढकालले फेसबुकमा लेखेका छन्, “युद्ध हुँदाहुँदै महाभारत लेखिएको होइन, युद्ध सकिएको धेरैपछि लेखिएको हो। युद्ध चलिरहेको छ भने कथा लेख्ने हतार नगर्नुहोस्। युद्ध सकिएपछि ढुक्कसँग लेखौँला।”
उनले युद्धकै बीचमा लेखिएका निष्कर्षहरू स्थायी नहुने दाबी गर्दै लेखेका छन्, “युद्ध नसकिँदै कथा लेख्न खोज्नेहरूको कथा पानीको फोकाजस्तै अस्थायी हुन्छ। युद्ध जारी छ, अझै केही समय चलिरहन्छ।”
महाभारतको प्रसंग जोड्दै उनले अभिमन्युको बलिदानीपछि युद्ध थप चर्किएको स्मरण गराएका छन्। साथै, घटनाक्रमलाई तटस्थ ढंगले हेर्न आग्रह गर्दै उनले लेखेका छन्, “बर्बरिकले देखे जस्तै वा सञ्जयले देखे जस्तै तटस्थ भावले युद्ध हेर्नुहोला।”
ढकालको अभिव्यक्तिलाई आयोगको प्रतिवेदनप्रतिको अप्रत्यक्ष टिप्पणीका रूपमा हेरिएको छ। यद्यपि उनले प्रतिवेदन वा आयोगको नाम भने उल्लेख गरेका छैनन्। उता, राष्ट्रिय मानवअधिकार आयोगले आफ्नो प्रतिवेदन कानुनबमोजिमको अनुसन्धान र तथ्यका आधारमा तयार गरिएको जनाएको छ।
