काभ्रे – विश्वका द्वन्द्वग्रस्त क्षेत्रहरूमा शान्ति स्थापनार्थ खटिएका तथा खटिइसकेका शान्ति सैनिकहरूको योगदानको सम्मानस्वरूप मनाइने अन्तर्राष्ट्रिय शान्ति सैनिक दिवस नेपाली सेनाले विशेष कार्यक्रमका साथ मनाएको छ।
नेपाली सेनाको आयोजनामा सोमबार वीरेन्द्र शान्ति कार्य तालिम केन्द्र पाँचखालमा आयोजित कार्यक्रममा प्रधान सेनापति अशोक राज सिग्देलले शान्ति मिसनका क्रममा वीरगति प्राप्त गरेका दुई सैनिकका परिवारलाई सम्मानपत्र प्रदान गरेका छन्। साथै शान्ति स्थापनार्थ उत्कृष्ट कार्य गर्ने पाँच सैनिकलाई कदरपत्र प्रदान गरिएको नेपाली सेनाले जनाएको छ।
कार्यक्रममा रक्षा सचिव, नेपाल प्रहरी, सशस्त्र प्रहरी बल नेपाल तथा राष्ट्रिय अनुसन्धान विभाग का प्रमुख तथा पदाधिकारी, स्थानीय जनप्रतिनिधि, परराष्ट्र मन्त्रालय का अधिकारी, काभ्रेपलाञ्चोकका प्रमुख जिल्ला अधिकारी, विभिन्न मित्रराष्ट्रका सैनिक सहचारी, सञ्चारकर्मी तथा नेपाली सेनाका उच्च पदस्थ अधिकारीहरूको उपस्थिति रहेको थियो।
नेपालले संयुक्त राष्ट्र संघ को आह्वानमा सन् १९५८ देखि शान्ति सैनिक खटाउँदै आएको छ। हाल नेपाल शान्ति सैनिक पठाउने राष्ट्रहरूको सूचीमा अग्रस्थानमा रहेको छ। संयुक्त राष्ट्र संघीय शान्ति मिसनअन्तर्गत विश्वका विभिन्न नौवटा मिसनमा नेपाली सेनाका ४ हजार १७९ जना शान्ति सैनिक कार्यरत छन्।
विश्व शान्ति स्थापनाको अभियानमा हालसम्म नेपाली सेनाका ७४ जना सैनिकले वीरगति प्राप्त गरेका छन् भने ७७ जना सैनिक घाइते भएका छन्।
