काठमाडौं – नेकपा (एमाले) का अध्यक्ष केपी शर्मा ओलीले नेपालमा राणा शासन, पञ्चायती व्यवस्था र राजतन्त्रजस्ता शासन प्रणालीहरू समाप्त भइसकेको उल्लेख गर्दै अहिले देखिएको अराजकतन्त्र पनि धेरै समय नटिक्ने बताएका छन्।
एमाले केन्द्रीय संगठन विभागद्वारा आयोजित ‘सदस्यता नवीकरण तथा विस्तार उत्प्रेरणा’ विषयक दुईदिने राष्ट्रिय कार्यशालाको उद्घाटन गर्दै ओलीले समय सधैं एकनास नहुने भएकाले कसैले पनि धेरै उत्साहित वा अहंकारी बन्न नहुने चेतावनी दिए।
उनले नेपालका राजनीतिक परिवर्तनहरूलाई स्मरण गर्दै विभिन्न शासन प्रणालीहरू इतिहास बनेको उल्लेख गरे। अब अराजकतन्त्रको अन्त्य पनि निश्चित रहेको उनको भनाइ थियो।
ओलीले गएको भदौ २३ र २४ गते भएका घटनाहरूलाई पूर्वनियोजित र षड्यन्त्रपूर्ण आपराधिक गतिविधि भएको दाबी गरे। नवयुवाको हत्या तथा अन्य आपराधिक क्रियाकलापलाई केही समूहले क्रान्तिको नाम दिन खोजे पनि त्यसलाई राष्ट्रिय मानवअधिकार आयोगको प्रतिवेदनले नै षड्यन्त्रपूर्ण र प्रायोजित घटना ठहर गरेको उनको भनाइ थियो।
“यो मैले भनेको होइन, राष्ट्रिय मानवअधिकार आयोगको प्रतिवेदनले भनेको हो। भदौ २३ र २४ को आक्रमण पहिल्यै षड्यन्त्र गरिएको प्रायोजित घटना थियो,” ओलीले भने।
उनले उक्त षड्यन्त्र एमालेविरुद्ध मात्र नभई राष्ट्रविरुद्ध पनि लक्षित रहेको बताए। “त्यो षड्यन्त्र एमालेका विरुद्धमा त थियो नै, त्यो राष्ट्रको विरुद्धमा पनि थियो,” उनले भने।ओलीले जनताबाट निर्वाचित बहुमत प्राप्त सरकारलाई संवैधानिक र संसदीय प्रक्रियाबाट हटाउन नसकेपछि अवैधानिक तथा आपराधिक माध्यम अपनाइएको आरोप लगाए।
“हाम्रो सरकार अत्यधिक बहुमतको सरकार थियो। त्यस सरकारलाई संवैधानिक, कानुनी र संसदीय बाटोबाट ढाल्ने प्रयास गरियो। त्यो सम्भव नभएपछि अवैधानिक र आपराधिक मार्गबाट विस्थापित गर्ने षड्यन्त्र भयो,” उनले भने।
उनका अनुसार सरकारविरुद्ध विभिन्न प्रकारका गतिविधिका लागि तालिमसमेत सञ्चालन गरिएको थियो। आगजनीका घटनामा अत्यधिक ज्वलनशील पदार्थ प्रयोग गरिएको, देशव्यापी रूपमा आगलागी गराउने योजना बनाइएको तथा गुगलमार्फत ठेगाना खोजेर नेताहरूका घरमा आगजनी गरिएको दाबी उनले गरे।
ओलीले लोकतान्त्रिक प्रणाली, सुशासन र विकासका उपलब्धिमाथि प्रहार गर्ने प्रयास सफल नहुने भन्दै एमाले कार्यकर्तालाई संगठन सुदृढीकरण र जनतामाझ पार्टीको सन्देश पुर्याउन सक्रिय हुन आग्रह गरे।
