काठमाडौँ– स्वदेशी उत्पादनको प्रवर्द्धन तथा दुग्ध क्षेत्रको सुदृढीकरणका लागि सरकारले विशेष चासो देखाएको छ। मन्त्रिपरिषद्को आजको बैठकमा सरकारी स्वामित्वमा रहेको दुग्ध विकास संस्थान (डीडीसी) का उत्पादनहरूको देशव्यापी प्रवर्द्धन र बजार विस्तारका विषयमा विस्तृत छलफल भएको छ।
बैठकमा गीता चौधरी ले डीडीसीका उत्पादनहरूको प्रयोग र प्रवर्द्धनलाई प्राथमिकतामा राख्नुपर्ने विषयलाई प्रमुख एजेन्डाका रूपमा प्रस्तुत गर्नुभएको थियो। उहाँले स्वदेशी दुग्ध उत्पादनको संरक्षण, दुग्ध किसानको हित प्रवर्द्धन तथा संस्थानको व्यावसायिक सुदृढीकरणका लागि सरकारका विभिन्न निकायबीच प्रभावकारी समन्वय आवश्यक रहेको बताउनुभयो।
मन्त्री चौधरीले नेपाली किसानबाट सङ्कलित दूधको उचित व्यवस्थापन, उत्पादनको सुनिश्चित बजार तथा उपभोक्तामाझ स्वदेशी दुग्धजन्य वस्तुको प्रयोग बढाउन सरकारी तहबाट आवश्यक सहयोग हुनुपर्नेमा जोड दिनुभयो। साथै, डीडीसीलाई थप प्रतिस्पर्धी, गुणस्तरीय र आत्मनिर्भर संस्थाका रूपमा विकास गर्न नीति तथा कार्यक्रममार्फत सहयोग आवश्यक रहेको धारणा राख्नुभयो।
बैठककै क्रममा मन्त्री चौधरीले वालेन्द्र शाह सहित मन्त्रिपरिषद्का सदस्यहरूलाई डीडीसीका विभिन्न उत्पादनहरूको प्याकेज वितरण गर्नुभएको थियो।
लामो समयदेखि नेपाली उपभोक्तालाई शुद्ध तथा गुणस्तरीय दूध, घिउ, दही, पनिर, चिजलगायतका दुग्धजन्य उत्पादन उपलब्ध गराउँदै आएको डीडीसीको प्रवर्द्धन अभियानलाई प्रधानमन्त्री शाहले समेत समर्थन जनाउनुभएको छ। प्रधानमन्त्रीले स्वदेशी उत्पादनको उपभोग बढाउन डीडीसीका उत्पादनहरूको प्रचार–प्रसार गर्दै नेपाली वस्तु प्रयोगलाई प्रोत्साहन गर्ने सन्देश दिनुभएको बताइएको छ।
सरकारले स्वदेशी उत्पादनको संरक्षण, किसानको आयवृद्धि तथा राष्ट्रिय अर्थतन्त्रलाई सुदृढ बनाउन यस्ता अभियानलाई थप प्रभावकारी बनाउने तयारी गरेको जनाएको छ।
