वीरगञ्ज । पर्सा जिल्ला अदालतले राष्ट्रिय स्वतन्त्र पार्टीका सभापति रवि लामिछाने विरुद्ध लगाइएको संगठित अपराधको अभियोग हटाउन अनुमति दिएको छ।सानो पाइला सहकारीको बचत रकम ठगी प्रकरणमा जिल्ला न्यायाधीश मोहन सुवेदीको इजलासले मंगलबार अभियोगपत्र संशोधन गर्न अनुमति दिएको हो।
अदालतको आदेशसँगै अब लामिछानेसहितका प्रतिवादीहरूमाथि सहकारी ठगीसम्बन्धी अभियोग मात्र कायम रहनेछ।पीडित बचतकर्ताको रकम फिर्ता गराउने प्रक्रियालाई सहज बनाउन तथा प्रतिवादीबीच मिलापत्रको वातावरण सिर्जना गर्न संगठित अपराधको अभियोग हटाउनु उपयुक्त हुने अदालतले ठहर गरेको छ।
महान्यायाधिवक्ताको कार्यालयको निर्णय तथा सरकारी वकिल कार्यालयको निवेदनका आधारमा अदालतले उक्त अनुमति दिएको हो।
यसअघि कास्की जिल्ला अदालतले पनि लामिछानेविरुद्धको संगठित अपराध तथा सम्पत्ति शुद्धीकरणसम्बन्धी अभियोग हटाउन अनुमति दिइसकेको थियो। अब उक्त प्रकरणमा सहकारी ठगीसम्बन्धी दाबीमा मात्र सुनुवाइ अगाडि बढ्नेछ।
