काठमाडौँ – नवनियुक्त विज्ञान, प्रविधि तथा नवप्रवर्तनमन्त्री महावीर पुन ले आफ्नो कार्यकालको समयसीमा आफैं तोकेका छन्। मंगलबार मात्रै मन्त्री नियुक्त भएका उनले आफू मन्त्रालयमा बढीमा तीन वर्ष मात्र रहने बताएका छन्।
मन्त्री पुनले सरकारको कार्यकाल पाँच वर्ष भए पनि आफू त्यति समय मन्त्रालयमा नबस्ने स्पष्ट पारे। उनले तीन वर्षसम्म निरन्तर मेहनत गरेर काम गर्ने र त्यसपछि नयाँ पुस्तालाई जिम्मेवारी हस्तान्तरण गर्ने योजना रहेको बताए।
‘यो सरकार पाँच वर्षको हो। तर म त्यति बेलासम्म बस्दिनँ। बढीमा तीन वर्ष बस्ने हो। त्यतिबेलासम्म रातदिन नभनी काम गर्ने हो,’ उनले भने, ‘त्यसपछि नयाँ भाइबहिनीलाई सुम्पिएर बिदा हुने हो।’
