काठमाडौं । उज्यालो नेपाल पार्टीका अध्यक्ष कुलमान घिसिङले जेनजी आन्दोलनका क्रममा ज्यान गुमाएका शहीद परिवारका सदस्यहरूले नेपाल विद्युत प्राधिकरणमा जागिर पाएकोमा खुशी व्यक्त गरेका छन्।
घिसिङले सामाजिक सञ्जालमार्फत प्रतिक्रिया जनाउँदै गत भदौ २३ र २४ गते भएको जेनजी आन्दोलनमा ज्यान गुमाएका परिवारमध्ये १६ परिवारका सदस्यले नेपाल विद्युत प्राधिकरणमा करार सेवामा रोजगारी प्राप्त गरेको जानकारी दिएका हुन्।
उनका अनुसार आफू ऊर्जा, जलस्रोत तथा सिँचाइ, भौतिक पूर्वाधार तथा यातायात तथा शहरी विकास मन्त्रीको जिम्मेवारीमा रहँदा आफ्नै अध्यक्षतामा गत पुस २२ गते बसेको सम्बन्धित समितिको बैठकले उक्त निर्णय गरेको थियो।
घिसिङले तत्कालीन समयमा शहीद परिवारका तर्फबाट २७ वटा निवेदन प्राप्त भएको उल्लेख गर्दै परिवारका सदस्यहरूको पहिचान गरी उनीहरूको शैक्षिक योग्यताका आधारमा नजिकको प्राधिकरण कार्यालयमा तीन तहसम्म करार नियुक्तिको व्यवस्था गरिएको बताएका छन्।
उनले उक्त निर्णय सरकार र जेनजी आन्दोलनका प्रतिनिधिबीच भएको सम्झौता, मन्त्रिपरिषद्बाट स्वीकृत सहायता सम्बन्धी कार्यविधि तथा शहीद परिवारका सदस्यहरूको निवेदनका आधारमा गरिएको स्पष्ट पारेका छन्।
शहीद परिवारका सदस्यहरूले रोजगारीको अवसर प्राप्त गरेकोमा आफूलाई खुशी र सन्तुष्टि मिलेको घिसिङले बताएका छन्।
