रातो मच्छिन्द्रनाथ जात्रा अन्तर्गत बुधबार रथलाई लगनखेलको थहिटी टोलबाट तानेर जावलाखेल पुर्याइएको छ।
वैशाख शुक्ल प्रतिपदादेखि सुरु भएको रथारोहणपछि विभिन्न स्थान हुँदै यात्रा अघि बढाइएको थियो। अब जावलाखेल पुगेको चार दिनपछि परम्पराअनुसार राष्ट्रप्रमुखको उपस्थितिमा ६ असारमा भोटो देखाउने कार्यक्रम तय गरिएको छ।
पुल्चोकबाट सुरु भएको रथयात्रा गाःबाहल, मंगलबजार, सुन्धारा, लगनखेल र इटिटोल हुँदै जावलाखेल पुगेको हो। भोटो प्रदर्शन सम्पन्न भएपछि रातो मत्स्येन्द्रनाथलाई सानो खटमा राखेर बुंगमती लगिने र त्यससँगै वार्षिक जात्रा समापन हुने परम्परा छ।
पौराणिक मान्यताअनुसार १२ वर्षसम्म परेको अनिकाल अन्त्यका लागि तत्कालीन राजा नरेन्द्र देव को समयदेखि यो जात्रा सुरु भएको विश्वास गरिन्छ।
