ललितपुर – जावलाखेलमा भव्य रूपमा भोटो जात्रा सम्पन्न भएलगत्तै वर्षा र सहकालका देवताका रूपमा पूजिने रातो मत्स्येन्द्रनाथलाई शनिबार साँझ उनको मूल वासस्थान बुङ्मती फर्काइएको छ ।
परम्पराअनुसार भोटो प्रदर्शन सम्पन्न भएपछि रातो मत्स्येन्द्रनाथलाई विशेष विधि र पूजाआजासहित बुङ्मती लगिएको हो । यससँगै काठमाडौं उपत्यकाको सबैभन्दा लामो तथा ऐतिहासिक रथयात्रा विधिवत् रूपमा समापन भएको छ ।
वैशाख शुक्ल प्रतिपदादेखि सुरु भएको रथयात्रा पुल्चोक, गाबहाल, मंगलबजार, सुन्धारा, लगनखेल हुँदै जावलाखेल पुगेको थियो । अन्तिम दिन भोटो जात्रा आयोजना गरी देवताको दर्शन तथा भोटो प्रदर्शन गरिएपछि रथयात्रा सम्पन्न गरिएको हो ।
नेवा: समुदायको आस्था र सांस्कृतिक पहिचानसँग जोडिएको यो जात्रालाई वर्षा, सहकाल र समृद्धिको प्रतीकका रूपमा लिने गरिन्छ । प्रत्येक वर्ष रातो मत्स्येन्द्रनाथलाई बुङ्मतीबाट ल्याई ललितपुर नगर परिक्रमा गराउने परम्परा रहिआएको छ ।
