चितवन । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनअन्तर्गत चौथो दिन देशभरिबाट आएका प्रतिनिधिहरूलाई विशेष सामग्रीसहितको झोला वितरण गरिएको छ।
महाधिवेशनको बन्दसत्र र सांगठनिक छलफलहरू चलिरहेका बेला प्रतिनिधिहरूको सहजता, पहिचान तथा कार्यक्रम व्यवस्थापनलाई थप प्रभावकारी बनाउन उक्त झोला उपलब्ध गराइएको पार्टी सचिवालयले जनाएको छ।
वितरण गरिएको झोलाभित्र रास्वपाको क्याप, पेन, कपी तथा परिचयपत्र (आईडी कार्ड) लगायतका सामग्री समावेश गरिएको छ।
महाधिवेशनमा सहभागी एक प्रतिनिधिका अनुसार यस प्रकारको व्यवस्थापनले बन्दसत्रका क्रममा टिपोट गर्न, कार्यक्रमलाई व्यवस्थित बनाउन तथा पार्टीको अनुशासन कायम राख्न सहयोग पुगेको छ।
रास्वपाले आफ्नो पहिलो राष्ट्रिय महाधिवेशनलाई प्रविधिमैत्री, अनुशासित तथा कम खर्चिलो बनाउने नीति लिएको जनाएको छ। पार्टीले महाधिवेशनमार्फत संगठनलाई थप संस्थागत र प्रभावकारी बनाउने लक्ष्य राखेको बताएको छ।
तस्वीर: नेपाल न्युज बैंक
