पोखरा – राष्ट्रिय फोटोपत्रकार समूह (एनएफपिजे-नेपाल), जिल्ला शाखा कास्कीका सचिव प्रेम थापा ‘मिलन युथ एनर्जेटिक फोटोग्राफी अवार्ड’बाट नगदसहित सम्मानित भएका छन्।
पोखरा फोटोग्राफर संघद्वारा आयोजित ४५औँ वार्षिक साधारण सभा, पाँचौँ पोखरा फोटोग्राफी अवार्ड वितरण, ‘फोकस’ तेस्रो स्मारिका विमोचन तथा २५औँ अधिवेशन समारोह–२०८३ का अवसरमा थापालाई उक्त अवार्ड प्रदान गरिएको हो।
अवार्डसँगै प्राप्त नगद रकम बराबरकै रकम थापाले आफ्नै तर्फबाट थप गरी बाढीपीडित परिवारको सहयोगका लागि प्रदान गर्ने घोषणा गरेका छन्। सामाजिक उत्तरदायित्वअन्तर्गत उनले पुरस्कारको रकममा थप रकम जुटाएर विपद् प्रभावित परिवारलाई सहयोग गर्ने निर्णय गरेका हुन्।
“सानो सहयोगले पनि कसैको दुःखमा थोरै भए पनि राहत मिलोस् भन्ने हाम्रो प्रयास हो,” थापाले भने।
थापा राष्ट्रिय फोटोपत्रकार समूह (एनएफपिजे-नेपाल), जिल्ला शाखा कास्कीका सचिव, चलचित्र पत्रकार संघ कास्कीका कार्यसमिति सदस्य तथा ‘इभेन्ट पोखरा’का सञ्चालक हुन्। उनी लामो समयदेखि फोटोग्राफी तथा फोटो पत्रकारितामा सक्रिय रहँदै आएका छन्।
यसअघि बंगलादेशमा सम्पन्न अन्तर्राष्ट्रिय फोटोपत्रकारिता अवार्डबाट समेत सम्मानित भइसकेका थापाले राष्ट्रिय तथा अन्तर्राष्ट्रियस्तरमा नेपालको प्रतिनिधित्व गर्दै फोटोग्राफीमार्फत नेपालको पहिचान र गौरव बढाउन योगदान पुर्याउँदै आएका छन्।
