दूरसञ्चार क्षेत्रको पछिल्लो प्रविधि फोरजी सेवा सुरु गरेको नेपाल टेलिकमले अब ‘एड्भान्स फोरजी’ सञ्चालन गर्ने भएको छ । नेपालमा हाल उपलब्ध फोरजीभन्दा निकै गुणस्तरीय सेवासहित आक्रामक बजारीरकण सुरु गर्ने योजनासहित टेलिकमकले यो सेवा सुरु गर्न लागेको हो ।
देशभर एकैपटक विस्तार गर्ने लक्ष्यसहित एड्भान्स फोरजीमा टेलिकम जुटेको हो । अब टेलिकमले फोरजी सेवा विस्तार गर्दा जहाँ कुनै पनि सेवा पुगेको छैन, त्यस्तो ठाउँमा सिधैं एड्भान्स फोरजी सेवा विस्तार गर्नेछ ।
टेलिकमका प्रबन्ध निर्देशक कामिनी राजभण्डारीका अनुसार भ्वाइस ओभर लङ टर्म इभोलुन ‘भीओएलटीई’मा ध्यान दिएर यो सेवा प्रयोगमा ल्याउने छौँ । जसले गर्दा जुनसुकै ठाउँमा पनि सजिलै इन्टरनेट चल्न सक्छ ।’ टेलिकमले यो परियोजनाका लागि अर्बौं रुपैयाँ लगानी गर्दैछ ।
फोरजी सेवाका लागि एकैपटक एउटा कोर र दुइवटा नेटवर्क गरी तीनवटा बोलपत्र आह्वान गरेको थियो । समूह एकमा मध्यमाञ्चल र मध्यपश्चिमाञ्चल र समूह दुईमा यसबाहेक सवै ठाउँमा नेटवर्क विस्तार गर्नुपर्नेगरी बोलपत्र आह्वान भएको हो । अहिले यी बोलपत्र मूल्याङ्कनको चरणमा छन् ।चाइना कम्युनिकेसन सर्भिस इन्टरनेसनल, जेडटीई कर्पोरेसन चीन, म्यावेनियर सिंगापुर, हुवावे टेक्नोलजिज् चीन बोलपत्रमा सहभागी भएका छन् ।
