काठमाडौं – नेपाली सेनाका प्रधान सेनापति महारथी अशोकराज सिग्देलले प्रधान सेनापति ट्रफी–२०८३ खेलकुद प्रतियोगिताको आज उद्घाटन गर्नुभएको छ। लगनखेलस्थित खेल मैदानमा आयोजित समारोहबीच प्रधान सेनापति सिग्देलले प्रतियोगिताको उद्घाटन गर्नुभएको हो।
नेपाली सेनाभित्र रहेका प्रतिभावान् खेलाडीको पहिचान गरी उनीहरूको खेल कौशल विकास गर्दै राष्ट्रिय तथा अन्तर्राष्ट्रियस्तरका खेलाडी उत्पादन गर्ने उद्देश्यले विसं २०६५ देखि प्रधान सेनापति ट्रफी प्रतियोगिता सञ्चालन हुँदै आएको छ।
यस वर्षको प्रतियोगितामा एथलेटिक्स, पौडी, बक्सिङ, तेक्वान्दो, भलिबल, बास्केटबल, फुटबल र जुडो गरी आठ विधा समावेश गरिएको छ। प्रतियोगितामा नेपाली सेनाका पृतना तथा बाहिनीका १४ वटा टोलीको सहभागिता रहेको छ।
प्रतियोगिताअन्तर्गत आज सम्पन्न पाँच किलोमिटर दौडमा महिलातर्फ मध्य पूर्वी पृतनाका प्युठ निर्मला केसी विजेता बन्नुभयो भने पुरुषतर्फ उत्तर पश्चिम पृतनाका सिपाही अर्जुन बुढा विजेता बन्नुभयो। विजेता खेलाडीलाई प्रधान सेनापति सिग्देलले पुरस्कार प्रदान गर्नुभएको थियो।
उद्घाटन समारोहमा नेपाली सेनाका रथीवृन्द, अधिकृत, निर्णायक मण्डल तथा विभिन्न विधाका खेलाडीहरूको उपस्थिति रहेको थियो।
