भक्तपुर – भक्तपुरमा पहिलोपटक ठूलो स्तरको परोपकारी सांगीतिक महोत्सव ‘म्युजिक जात्रा–ख्वप’ आयोजना हुने भएको छ । लुपिक्स इन्टरटेनमेन्ट, दृष्टिकोण र रोयल इभेन्ट्सको आयोजनामा आगामी मंसिर १२ गते (नोभेम्बर २८, २०२६) भक्तपुरको सल्लाघारी मैदानमा महोत्सव आयोजना गर्न लागिएको हो ।
महोत्सवबारे जानकारी दिन क्लब बागमती भक्तपुरमा आयोजित पत्रकार सम्मेलनमा परम्परागत सांस्कृतिक प्रस्तुति, विभिन्न कलाकारको लाइभ सांगीतिक प्रस्तुति, खाना तथा लाइफस्टाइल स्टलसँगै भक्तपुरको कला, संस्कृति र सम्पदालाई प्रवर्द्धन गर्ने कार्यक्रम समावेश गरिने आयोजकले बताएको छ ।
महोत्सवमा लोकप्रिय संगीतकर्मी कुमा सागर तथा द ख्वप ब्यान्ड पहिलोपटक भक्तपुरको मञ्चमा प्रस्तुत हुँदैछन् । भक्तपुरमै फर्किएर आयोजना गर्न लागिएको ‘होमकमिङ कन्सर्ट’ कुमा सागरको सांगीतिक यात्राका लागि विशेष कार्यक्रम हुने आयोजकले जनाएको छ ।
कुमा सागरसँगै ‘मुक्ति एण्ड रिभाइभल’, निभाः डंगोल र छाबहि दबु लगायतका कलाकारले पनि प्रस्तुति दिनेछन् । महोत्सवको टाइटल प्रायोजक एक्सट्रिम इनर्जी ड्रिंक रहेको छ ।
आयोजकका अनुसार कार्यक्रम टिकटविहीन हुनेछ । तर कार्यक्रममा सहभागी हुन प्रत्येक दर्शकले एक्सट्रिम इनर्जी ड्रिंकको एउटा खाली क्यान ल्याउनुपर्ने व्यवस्था गरिएको छ ।
महोत्सवबाट संकलित रकममध्ये कुल नाफाको ५० प्रतिशत भक्तपुरमा सन् १९८५ देखि अपाङ्गता भएका बालबालिकाका लागि सिकाइ केन्द्र सञ्चालन गर्दै आएको सामुदायिक पुनर्स्थापना संस्था (CBRO), भक्तपुरलाई प्रदान गरिनेछ । यस्तै, डिजिटल दान प्लेटफर्ममार्फत संकलन हुने सम्पूर्ण प्रत्यक्ष दान रकम पनि सीबीआरओलाई नै हस्तान्तरण गरिने आयोजकले जनाएको छ ।
महोत्सवको मुख्य उद्देश्य सीबीआरओका लागि कोष संकलन गर्नुका साथै संस्थाले गर्दै आएको कामबारे जनचेतना अभिवृद्धि गर्नु रहेको छ । त्यस्तै, भक्तपुर र आसपासका बासिन्दालाई निःशुल्क उच्चस्तरीय सांस्कृतिक तथा सांगीतिक कार्यक्रम उपलब्ध गराउने, स्थानीय कला, शिल्प, संगीत तथा परिकारको प्रवर्द्धन गर्ने र स्थानीय कलाकार कुमा सागरलाई सम्मान गर्ने उद्देश्य पनि राखिएको छ ।
आयोजकले महोत्सवमा २५ हजारदेखि ३० हजार वा सोभन्दा बढी दर्शक सहभागी हुने अपेक्षा गरेको छ । महोत्सवलाई वार्षिक कार्यक्रमका रूपमा मात्र सीमित नराखी संगीत, संस्कृति र सामाजिक सेवासँग जोडिएको अभियानका रूपमा अघि बढाउने लक्ष्य रहेको आयोजकले जनाएको छ ।