काठमाडौं – निजी विद्यालयहरुको संगठन प्याब्सनले आगामी बुधबारबाट विद्यालय खोल्ने जनाएको छ ।
निजी विद्यालयमा आर्थिक संकट पर्न थालेको र अभिभावक स्वयंले विद्यालय सूचारु गर्न दवाव दिन थालेपछि विद्यालय खोल्ने तयारी भैरहेको प्याब्सनका अध्यक्ष टीकाराम पुरीले बताए । उनले परीक्षाफल सार्वजनिक नगरेका विद्यालयले परीक्षाफल प्रकाशित गर्ने र परीक्षाफल प्रकाशित गरिसकेका विद्यालयले भर्ना प्रकुया अघि बढाउने गरी विद्यालय खोल्ने तयारी गरेको जानकारी दिए ।
अध्यक्ष पुरीले प्याब्सन र एन प्याब्सनले आइतबार भर्चुअल पत्रकार सम्मेलन गरी विद्यालय खुला गर्ने विषयमा जानकारी दिने बताए । यस्तै, प्याब्सनका सह–अध्यक्ष डिके ढुंगानाले सरकारले निजी विद्यालयको योगदानको विषयलाई वेवास्ता गरेको र बजेटमा कुनै सम्बोधन नगरेको कारण आफ्नै ढंगले अघि बढ्नुको विकल्प नभएको बताउनुभयो ।
शिक्षा मन्त्रालयका प्रवक्ता दीपक शर्माले निश्चित मापदण्ड र कार्यविधि तयार गरी अनलाईन वा अन्य माध्यमबाट कक्षा सञ्चालन गर्ने तयारी भैरहेको बताए । उनले जेठ २५ वा ढिलो भए असार १ गतेबाट विद्याथीको अभिलेखिकरण गर्ने र नयाँ भर्नाको प्रकृया अघि बढाउन निर्देशन दिने तयारी गरेको जानकारी दिए ।
