रामेछाप – नेकपा क्रान्तिकारी माओवादीको विद्यार्थी संगठन अखिल (क्रान्तिकारी)ले रामेछापको मन्थलीमा विरोध प्रदर्शन गरेको छ । सोमबार साँझ मन्थलीको थापा चोकमा राँके जुलुससहित विरोध प्रदर्शन गरेको हो । प्रदर्शनमा रोग ठुलो कि भोक ठुलो, जनतालाई राहत देउ, सिमा विवाद सुल्झाउ, मजदूर लड्ने रोगसंग कि भोकसंग,राष्ट्रियता संरक्षण गरौं लगायतका नारा लगाएका थिए ।
बिश्व नै कोभिड -१९ ले थला परेको र नेपाल पनि अछुतो नरहेको अवस्थामा देशका ठुला भनौदाहरुले जनताको सामान्य जीवनयापनमा समेत ध्यान नदिएको भन्दै बिरोध प्रदर्शन गरिएको अखिल (क्रान्तिकारी)का केन्द्रिय सदस्य विनोद केसीले जानकारी दिए ।
उनले सरकारले ठूलो राष्टघाती सन्धी सम्झौता गर्न खोजेको ,हाल विदेशमा अलपत्र नेपालीलाई फिर्ता ल्याउन नसकेको ,सिमाको सामान्य समस्या पनि चाडाे हल गर्न नसकेको र जातीय भेदभावमा परी जनताको निर्मम हत्या हुँदा समेत गम्भीर रुपमा नलिएको भन्दै प्रदर्शन गरिएको बताए।
