रुपन्देही – प्रदेश ५ को तीन सदस्य मन्त्रिपरिषद कार्यालयले मुख्यमन्त्री, मन्त्री र सांसदको पारिश्रमिक निर्धारण प्रारम्भिक मस्यौदा तयार पारेको छ । तयार गरेको प्रारम्भिक मस्यौदामा सेवा सुविधा अनुसार मुख्यमन्त्रीको मासिक पारिश्रमिक ६० हजार ९ सय रुपैयाँ, मन्त्रीको ५२ हजार रुपैयाँ प्रस्ताव गरिएको छ । प्रदेश सभाषदकोे पारिश्रमिक ४५ हजार हुनेछ । मन्त्री तथा अन्यको दैनिक भत्ता ७ सय ५० र दैनिक भ्रमण भत्ता १ हजार ५ सय रुपैयाँ पाउने गरि तयार बनाएको छ । करिब एक साता लगाएर मस्यौदाको प्रारम्भिक खाका तयार गरेको हो । मुख्यमन्त्री कार्यालयका कानुन सचिव निर्मला अधिकारी भट्टराईले प्रदेशसभा जनप्रतिनिधि अन्तर्गत सदस्य देखि मन्त्री र मुख्यमन्त्रीको पारिश्रमिक तथा सुविधाबारे मस्यौदा अन्तिम चरणमा पुगेको बताइन ।
केन्द्रले पठाएको प्रारम्भिक विधेयकमा आधारित रहेर यहाँको आवश्यकता अनुसार मस्यौदालाई अन्तिम रुप दिन लागेको उनको भनार्इ छ । केन्द्र तथा अन्य प्रदेशले दिने सुविधा र पारिश्रमिकसँग बाझिन नदिन राय सल्लाह र परामर्श पनि लिइरहेका छौं, अधिकारीले भनिन । मन्त्री देखि सांसद सबैलाई आवास बापत मासिक घरभाडा १२ हजार रुपैयाँ दिने गरी प्रस्ताव गरेको समेत उनले बताईन । संघले प्रदेशलाई पठाएको विधेयकमा उल्लेखित भएकै रकम हो ।
मुख्यमन्त्रीले सवारी सुविधा सहित इन्धन मासिक १ सय ५० लिटर, मोबिल ३ महिनामा १० लिटर मात्र छ । मासिक २ हजार सञ्चार खर्च छ । प्रारम्भिक मस्यौदामा उल्लेख भए अनुसार उनका लागि सरकारी आवास सुविधा उल्लेख हुनेछ । संघले केन्द्रलाई पठाएको विधेयकमा मन्त्रीको मासिक पारिश्रमिक ५२ हजार उल्लेख गरिएको छ । प्रदेशले तयार गरेको मस्यौदामा समेत त्यति नै रकम उल्लेख छ । उनीहरूलाई गाडी सुविधा उल्लेख छ । केन्द्रको विधेयकमा मन्त्रीका लागि सरकारी आवास सुविधा उल्लेख छैन । प्रदेश सरकारले भने सबै मन्त्रीका लागि आवास भैरहवामा व्यवस्थापन गरिरहेको छ । मस्यौदा प्रदेशसभा विधेयकका रुपमा छलफल गरिने सरकारका प्रवक्ता वैजनाथ चौधरीले वताए । प्रदेशसभाको बैठक २७ फागुनमा बस्ने भएको छ ।
हिमालय टाइम्सबाट
