काठमाडौं – बडादशैँको सप्तमीका दिन पर्ने फूलपाती पर्व आज राजधानीमा धुमधामका साथ मनाइएको छ । सैनिक मञ्च टुँडिखेलमा विशेष समारोहसहित फूलपाती बढाइँ गरिएको हो।
राष्ट्रपति रामचन्द्र पौडेलको प्रमुख आतिथ्यतामा सम्पन्न सो समारोहमा नेपाली सेनाले शङ्खघोष, राइफल सलामी, तोपद्धारा बढाइँसहित सैनिक परेड प्रदर्शन गरेको थियो । साथै सेनाको हेलिकप्टर र ड्रोनमार्फत ‘फूलपाती बढाइँ समारोह–२०८२’ लेखिएको ब्यानर प्रदर्शन गरिएको थियो भने पुष्पवृष्टि गरेर माहोल झन् उल्लासमय बनाइएको थियो । सो अवसरमा दुर्गा नाच र दुर्गा वन्दना पनि प्रस्तुत गरिएको थियो।
समारोहमा उपराष्ट्रपति रामसहायप्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमान सिंह राउत, सभामुख देवराज घिमिरे, राष्ट्रियसभा अध्यक्ष नारायणप्रसाद दाहाल, मन्त्रिपरिषद्का सदस्य, उच्चपदस्थ व्यक्तित्व, कूटनीतिक नियोगका प्रमुख तथा प्रतिनिधिहरूको उपस्थिति थियो।
नेपाली सेनाले आयोजना गर्ने यो समारोह धर्म, संस्कृति र परम्पराको निरन्तरताका रूपमा प्रत्येक वर्ष हर्षोल्लासपूर्वक मनाइँदै आएको छ।
