काठमाडौं – संस्कृति, पर्यटन तथा नागरिक उडड्यनमन्त्री योगेश भट्टराईले कार्यालय समयमा फेसबुक नचलाउन त्रिभुवन अन्तर्राष्ट्रिय विमानस्थलका कर्मचारीलाई निर्देशन दिएका छन् ।
त्रिभुवन अन्तर्राष्ट्रिय विमानस्थलका कर्मचारीको सकरात्मक सोच विषयक प्रशिक्षण तालिमको आइतबार काठमाडौंमा उद्घाटन गर्दै मन्त्री भट्टराईले फेसबुक नचलाउन निर्देशन दिएका हुन् ।
मन्त्री भट्टराईले कार्यालय समयमा निदाउने, फेसबुक चलाएर बस्ने कर्मचारीहरुको तस्किर आफूले संकलन गरिरहेको पनि जानकारी दिए । उनले त्यस्ता कर्मचारीलाई कारबाही गर्ने र दाग नलागेका कर्मचारी विमानस्थलमा पठाउने बताए ।
कर्मचारीका गतिविधिसमेतको निगरानीका लागि थप सिसिटिभी क्यामेराको थप व्यवस्था गर्ने योजना रहेको जानकारी दिदै उनले त्रिभुवन अन्तर्राष्ट्रिय विमानस्थल मुलुकको इज्जतसँग जोडिएको बताए ।
