सशस्त्र प्रहरी बल (एपीएफ) नेपालले शारीरिक रुपमा अंगभंग भई अशक्त भएका प्रहरी कर्मचारीको वृत्ति विकासका लागि एक तह बढुवा गर्ने भएको छ ।
आफूलाई प्राप्त जिम्मेवारी बहन गर्ने क्रममा शारीरिक रुपमा अशक्त भएका सशस्त्र प्रहरी कर्मचारीहरूको वृत्ति विकासलाई मध्यनजर गरी एक तह बढुवा दिने व्यवस्था गरिएको एपीएफले जनाएको छ ।
सो अन्तर्गत सशस्त्र प्रहरी नायब उपरीक्षक अरुण ढुंगानालाई सशस्त्र प्रहरी उपरीक्षक र सशस्त्र प्रहरी निरीक्षक वामदेव पण्डित (शर्मा)लाई सशस्त्र प्रहरी नायब उपरीक्षक पदमा बढुवा सिफारिस गरिएको छ ।
बढुवा भएका सशस्त्र प्रहरी कर्मचारीहरू सशस्त्र प्रहरी बल नेपाल प्रधान कार्यालय मानवश्रोत विभाग अन्तर्गत रहने छन् ।
एक पटकको लागि मात्र एक तह पदोन्नति दिई जुनसुकै कारण सो पद रिक्त भएमा स्वतः तल्लो पदमा कायम हुने गरी विशेष पद र दरबन्दी सिर्जना गरिएको सशस्त्र प्रहरी बल नेपालका सह प्रवक्ता डीएसपी शैलेन्द्र थापाले बताए ।
ढुंगाना र शर्मा द्वन्द्व कालमा विद्युतीय धरापमा परी गम्भीर घाइते भइ अंगभंग भएका अधिकृत हुन् ।
सशस्त्र प्रहरी बल नेपालको संगठन तथा व्यवस्थापन सर्वेक्षण प्रतिवेदन २०८० स्वीकृत भएपश्चात सो व्यवस्था लागू भएको हो ।
साथै अन्य सशस्त्र प्रहरी कर्मचारीहरूलाई समेत संगठन तथा व्यवस्थापन सर्वेक्षण प्रतिवेदन अन्तर्गत क्रमशः सम्बोधन गरिँदै लैजाने योजना रहेको एपीएफले जनाएको छ ।
