हाल पहाडी भेगमा आंशिक बदली रही देशका बाँकी स्थानमा मौसम सामान्यतया सफा रहेको मौसम पूर्वानुमान महाशाखाले जनाएको छ। नेपालमा अहिले पश्चिमी वायुको आंशिक प्रभाव छ।
महाशाखाका अनुसार दिउँसो पहाडी क्षेत्रमा आंशिकदेखि सामान्य बदली रही देशका बाँकी स्थानमा आंशिक बदलीदेखि मौसम सामान्यतया सफा रहनेछ।
यस क्रममा दिउँसो पहाडी भूभागका थोरै स्थानमा मेघगर्जन/चट्याङसहित हल्का वर्षाको सम्भावना छ। साथै देशको उच्च पहाडी तथा हिमाली भूभागका थोरै स्थानमा हल्का हिमपातको सम्भावना रहेको महाशाखाले जनाएको छ।
यसैगरी आज राति पहाडी भेगमा आंशिक बदली रही देशका बाँकी स्थानमा मौसम सामान्यतया सफा रहनेछ।
यस क्रममा राति कोशी, बागमती र गण्डकी प्रदेशका उच्च पहाडी तथा हिमाली भूभागका एक/दुई स्थानमा हल्का हिमपातको सम्भावना रहेको महाशाखाले जनाएको छ।
मौसमविद् रोजन लामिछानेका अनुसार देशभर तापक्रम क्रमशः घट्दो क्रममा छ। ‘त्यस्तो धेरै मात्रामा घटेको छैन’, उनले भने, ‘हल्का हल्का घट्दै छ।’
यस क्रममा आज बिहान पौने ६ बजेको मापनअनुसार काठमाडौँ उपत्यकाको न्यूनतम तापक्रम ११ डिग्री सेल्सियस छ। यस्तै उपत्यकाको अधिकतम तापक्रम आज २४ देखि २६ डिग्रीसम्म पुग्ने अनुमान गरिएको उनले बताए।
