काठमाडौँ – नेपाल टी–२० विश्वकपमा छानिएसँगै नेपाल क्रिकेट संघ (क्यान) ले खुसीयाली बाँडेको छ । क्यानले सामाजिक सञ्जालमार्फत नेपाली क्रिकेटको यात्रा विश्वस्तरमा पुगेको भन्दै खुसीलाई बाँडेको हो ।
‘हिमालयको मुटुबाट विश्वमञ्चसम्मको असाधारण यात्रा ! नेपाली क्रिकेट टोलीले टी–२० विश्वकप २०२४ मा आफ्नो स्थान सुरक्षित गर्दै हामीलाई गौरवान्वित बनाएको छ,’ क्यानले सामाजिक सञ्जालमा लेखेको छ ।
नेपाल शुक्रबार मुलपानी क्रिकेट मैदानमा खेलिएको सेमिफाइनल खेलमा संयुक्त अरब इमिरेट्स (यूएई) लाई आठ विकेटले हराउँदै टी—२० विश्वकपमा छनोट भएको हो ।
नेपालले अब विश्वकप छनोट एसिया छनोट फाइनलको उपाधिका लागि ओमानसँग खेल्नेछ।
आजै भएको अर्को सेमिफाइनलमा बहराइनलाई १० विकेटले पराजित गर्दै ओमानले पनि विश्वकपमा स्थान पक्का गरेको हो।
